Sandkassinn mun á næstunni fara yfir stefnu allra flokka í innflytjendamálum og málum flóttafólks og hælisleitenda sem bjóða fram í alþingiskosningum sem fara fram þann 28. Október 2017. Við munum síðan gefa út lista yfir stefnuskrá allra flokka í útlendingamálum. Sandkassinn mun að sjálfsögðu vega stefnu flokkanna og síðan gefa út hvaða flokkum við álítum treystandi til að hafa umsjón með útlendingamálum.

Miðflokkurinn

Vara þarf sérstaklega alla fylgjendur og unnendur fjölmenningar í landinu við því að kjósa Miðflokkinn til að fara með stjórn útlendingamála á næsta kjörtímabili.

Ekki verður ráðið í nein áform Miðflokksins í fjölmenningarmálum enda virðist flokkurinn einfaldlega hafa ákveðið að setja sér enga stefnu í þeim málaflokkum. Um leið og vídeó er á vefsíðunni midflokkurinn.is með ræðu Sigmundar Davíðs Gunnlaugssonar ásamt glærum sem standa lesendum til boða, þá fjallar formaður þessa nýstofnaða flokks þar alfarið um efnahagsmál og sókn á sviði stýringar hinna ýmsu mála. Stefna í málefnum fjölmenningarsamfélagsins er ekki til staðar hjá flokknum og verður það að teljast alvarlegt í landi þar sem í kring um 10% landsmanna eru innflytjendur að flokkurinn skuli mæta til leiks stefnulaus í málefnum þeirra.

Engar samþykktir liggja heldur frammi. Samkvæmt þessu þá búa einungis innfæddir Íslendingar hér á landi að mati liðsmanna miðflokksins.

Í fyrsta lagi þá tekur mat þetta á hæfi Miðflokksins til að fara með stjórn Útlendingamála tillit til nokkurra þátta og þ.m.t. Stefnuskrár sem ekki kemur til skoðunar. frammistöðu og pólitískrar fortíðar frambjóðenda flokksins.

Meðal oddvita framboðslista Miðflokksins eru  nokkur kunnugleg nöfn úr forystu Framsóknarflokksins: Sigmundur Davíð Gunnlaugsson fyrrverandi formaður Framsóknarflokksins, Þorsteinn B. Sæmundsson fyrrverandi þingmaður, Guðfinna Jóhanna Guðmundsdóttir borgarfulltrúi Framsóknar og Flugvallarvina, Gunnar Bragi Sveinsson fyrrverandi ráðherra Framsóknarflokksins.

Þá hefur Framsóknarflokkurinn lagst eindregið gegn því að taka við kvótaflóttafólki frá átakasvæðum sem þegar er komið til Evrópu, en þess í stað viljað handvelja flóttafólk í flóttamannabúðum í Líbanon til að koma til Íslands. Með þessu hefur Framsóknarflokkurinn sem fór með stjórnartaumana í landinu fram að kosningum fyrir ári síðan, hlaupist undan ábyrgð í málefnum flóttafólks frá Sýrlandi, Afganistan og Írak sem dæmi, gagnvart Evrópusambandinu og komið sér hjá því að takast á við þá ábyrgð sem að öll Schengen ríki ættu að gera sér grein fyrir.

Hótanir í garð fjölmiðla og fræðimanna

Framsóknarmenn höfðu á því kjörtímabili oft haft í hótunum við þá sem gagnrýndu flokkinn, þá höfðu þingmenn flokksins viljað láta reka bæði blaðamenn og háskólastarfsmenn sem þeir álitu fara of hörðum höndum um flokkinn í umfjöllun og greiningu. Þingmenn hafa hótað Ríkisútvarpinu og gagnrýnt fjölmiðlafólk ótæpilega. Raunar hafa samsæriskenningar formannsins sem nú er formaður Miðflokksins færst í aukana til dagsins í dag og eru orðnar á slíkum nótum að ógerningur er að taka manninn alvarlega.

Forysta Framsóknarflokksins lagðist ekki gegn framgöngu Framsóknar og Flugvallarvina í borginni þar sem að borgarfulltrúar flokksins kröfðust þess að Múslimum yrði neitað um að byggja Mosku i Sogamýri. Þarna lagðist Framsóknarflokkurinn á árarnar með borgarfulltrúum flokksins í tilraun þeirra til að fá að brjóta mannréttindi með mismunun á grundvelli trúar. Bæði Gunnar Bragi Sveinsson og Sigmundur Davíð Gunnlaugsson voru forystumenn í Framsóknarflokknum á þessum tíma og þeir eru einnig í forystu Miðflokksins. Engin stefnubreyting hefur átt sér stað hjá þeim persónulega í málefnum útlendinga.

Guðfinna Jóhanna Guðmundsdóttir borgarfulltrúi Framsóknar og Flugvallarvina barðist gegn því að Moska yrði byggð í Sogamýri og var ein af þeirra þriggja framsóknarkvenna sem mættu óboðnar í veislu háskólanema þar sem þær gerðu grín að múslimakonum með búrku. Þá átti Guðfinna aðild að skipan Gústafs Níelssonar, yfirlýsts andstæðings fólks sem er múslimatrúar, í Mannréttindaráð Reykjavíkurborgar. Guðfinna hefur fram til dagsins í dag ekki viljað kannast við ýmsar yfirlýsingar sem hún hefur þó sannarlega látið falla en hefur þess í stað látið þá skoðun í ljós ítrekað að að henni sé sótt að ósekju.

Úr mati okkar á Framsóknarflokknum árið 2016 og er niðurstaða okkar fyrir Miðflokkinn samhljóðandi fyrir þessar kosningar 2017 enda tíðkast ekki að taka pólitískt kennitöluflakk til greina. Meðlimir framboðsins byrja einfaldlega ekki með hreint borð. Hér fer niðurstaða okkar af athugun á hæfi Framsóknarflokksins til að fara með stjórn Útlendingamála árið 2016. Engar sérstakar nýjar forsendur eru á borðinu til að breyta því mati þótt neyð flóttafólks og hælisleitenda versni að sjálfsögðu og aukist með hverjum deginum:

Heyrst hafa þær tillögur meðal þingmanna flokksins að eðlilegt væri að láta hælisleitendur hér á landi ganga með ökklabönd svo að hægt væri að halda upp rafrænu eftirliti með þeim jafnvel þótt þetta sé saklaust fólk. Einnig hafa heyrst þau viðhorf meðal þingmanna flokksins að afnema ætti alla leynd yfir persónuuplýsingum hælisleitenda hér á landi. Í samþykktum flokksins er talsverð áhersla lögð á aukna landamæragæslu og forvirkar rannsóknarheimildir vegna m.a. innflutnings á erlendum glæpagengjum til landsins. Allt er þetta í stíl, annað verður bara ekki sagt.

Þingmenn og ráðherrar flokksins tóku varðstöðu ásamt Sjálfstæðismönnum utan um Hönnu Birnu Kristjánsdóttur í Lekamálinu. þar sem að þessi þáverandi innanríkisráðherra Sjálfstæðisflokksins beitti sér með fullum stuðningi flokksforystu Sjálfstæðisflokks og Framsóknarflokks, í máli hælisleitandans Tony Omos, konu hans og þá ófæddu barni þeirra, með slíkum hætti að ráðherran hraktist að lokum úr embætti. Umboðsmaður Alþingis gaf út álit í málinu að lokinni langri og ítarlegri frumkvæðisrannsókn.

Raunar var Framsóknarflokkurinn í beinum tengslum og í bakgrunni yfirtöku á DV á haustinu 2014, þar sem að óánægja var meðal flokksmanna með frammistöðu blaðamanna DV í Lekamálinu og það væri erfitt að horfa fram hjá beinni aðkomu Framsóknarflokksins að yfirtökunni sem í raun var áhlaup á frjálsa fjölmiðlun og rannsóknarblaðamennsku í landinu. Einnig var þarna á ferðinni áhlaup Framsóknarmanna á Nígerískan hælisleitanda og fjölskyldu hans.

Í þessum starfsháttum Framsóknarflokksins birtist raunstefna flokksins og er hún í afar litlu ef þá nokkru samræmi við þá stefnu sem ber fyrir augu í samþykktum flokksins. Stefna Framsóknarflokksins er einnig í algjöru ósamræmi við þann vilja þjóðarinnar sem mælst hefur í skoðannakönnunum.

Við vörum eindregið alla unnendur fjölmenningar og áhugafólk (sem telur í kring um 75% landsmanna) um að tekið verði við auknum fjölda hælisleitenda og flóttammanna, við því að að kjósa Framsóknarflokkinn til þess að fara áfram með stjórn landsins. Rasismi má segja að sé á frumstigum hér á landi og er í sjálfu sér engin ástæða til að ætla að rasismi muni færast stórkostlega í aukana hér á landi í náinni framtíð.

Þessa mannfjandsamlegu stefnu Framsóknarflokksins í innflytjendamálum er að sjálfsögðu ekki að finna í stefnu flokksins á blaði. raunar eru engin sérstök áform um eitt eða neitt á blaði hjá Framsókn í þessum málaflokki.

En pólitísk innflytjendastefna sem byggist á annarri eins harðlínu og andúð í garð hælisleitenda og einkennir bæði yfirlýsingar, samþykktir, lagasetningar sem og málflutning einstakra þingmanna Framsóknarflokksins á þessu kjörtímabili sem nú er að ljúka, er þó til þess fallin að vinna saklausum hælisleitendum mikin skaða og margfalt meiri skaða en rasismi veldur hér innanlands og er sá skaði nú nægur samt. Sú óþarfa harka sem ríkt hefur í rekstri Útlendingastofnunar á þessu kjörtímabili veldur hælisleitendum ólýsanlegu tjóni sem felst í þjáningum, sundrungu fjölskyldna, fátækt og óþörfum dauðsföllum.

Framsóknarflokkurinn fær ekki möguleika eins og aðrir flokkar til að skila inn endurbættri stefnu eða áformum og fá þannig þetta mat uppfært enda tekur matið mið af frammistöðu flokksins ekki síður en stefnuskránni.

 

Gunnar Waage

Gunnar Waage

- Gunnar Waage er blaðamaður og ritstjóri Sandkassans frá árinu 2013.

Hann er Trommari, Tónskáld og skólastjóri Trommuskólans, fyrrverandi deildarstjóri og einn af stofnendum Tónlistarháskóla G. Martell í Mexíkóborg. Hann lauk burtfararprófi frá McNally Smith College of Music, en duflar við kerfisfræði og er áhugamaður um bardagaíþróttir. Hann rýnir í þjóðfélagsmál og lætur sig flest varða.Hann er einstæður faðir, jafnréttissinni, fjölmenningarsinni og áhugamaður um velferð barna. Starfar við túlkun og þýðingar og fæst við spænskukennslu.


Hann er pistlahöfundur á Kvennablaðinu og var pistlahöfundur á DV en hætti skrifum á DV ásamt fleirum, í þeim tilgangi að sýna blaðamönnum og ritstjórn blaðsins samstöðu í kjölfar yfirtöku á félaginu í September 2014.
Gunnar Waage

Kosningavakt 2017. Miðflokkurinn: Aðvörun

| Kosningavakt 2017 |
About The Author
- - Gunnar Waage er blaðamaður og ritstjóri Sandkassans frá árinu 2013. Hann er Trommari, Tónskáld og skólastjóri Trommuskólans, fyrrverandi deildarstjóri og einn af stofnendum Tónlistarháskóla G. Martell í Mexíkóborg. Hann lauk burtfararprófi frá McNally Smith College of Music, en duflar við kerfisfræði og er áhugamaður um bardagaíþróttir. Hann rýnir í þjóðfélagsmál og lætur sig flest varða.Hann er einstæður faðir, jafnréttissinni, fjölmenningarsinni og áhugamaður um velferð barna. Starfar við túlkun og þýðingar og fæst við spænskukennslu. Hann er pistlahöfundur á Kvennablaðinu og var pistlahöfundur á DV en hætti skrifum á DV ásamt fleirum, í þeim tilgangi að sýna blaðamönnum og ritstjórn blaðsins samstöðu í kjölfar yfirtöku á félaginu í September 2014.